لعل الأفكار تحب الحرية فتتحول إلى كلمات

Posts tagged “حب

رسائل غرامية – التربية


حب من النظرة الأولى ،هاد يلي صار فيني وقت شفت عدد العاملين فيكي (350,000) لك يا قلبي أكتر من تعداد الجيش ،هلق الصراحة الحق معك لأنو مين هاد يلي ما وقع بغرامك ما حبك إلزامي والأمية خلت أنسة القومية بصف السابع تبكي وهي عم تورجينا بأول السنة بعض الأكتشافات ،إنو في طلاب نجحو من السادس وما بيعرفو يقرو ويكتبو ،طبعا أنا ضليت مفكرها تمثيلة باعتبار كل رفقاتي بصف السادس بيعرفو يقرو ويكتبو إلا ابن المديرة كان يخربط بالإملاء ،لحتى كبرت وشفت أطفال صف سادس ولسا ما بيعرفو يقرو ويكتبو فهنن على الورق غير أميين ولكن على أرض الواقع كائنات غريبة سبحان الله خالق الأكوان وخالق المكتب المركزي للإحصاء.

يا روحي إنت قديش زعجوكي بالفترة الأخيرة بقصة الضرب وكأنو هية شغلة جديدة ولك خسئوا ، هلق صحيح أنا بينعدوا على أصابع الإيد الأتلات يلي أكلتهن وكل مرة أمرض ويجي بابا يتخانق مع الأنسة وتصير تخاف تضربني وبالإعدادي الموجه كان رفيق الوالد وبالثانوي كنت صاحب بدعة الخروج من الصف وعدم الرضوخ لاستاذ مجنون بدو يضرب كل الطلاب، بس والله بتذكر رفقات مساكين كل يوم أتلة وبطرق تحرك مراكز الإبداع والشعور كالشد من السوالف والفلقة على اجرين مبلولين وعص الأصابع على قلم بلاستيك بس يعني هنن مو مربايين ببيت أهلهن بيستاهلو لك قلبي معلش ،هدول أطفال وبعض المذاهب الفلسفية المتطرفة بتعتبرهن شياطين صغيرة لازم نهذب أخلاقهن وبعدين يا عمري ضرب الحبيب زبيب. الله يعافيها ستي لهلق بتدعي على استاذ عمي يلي ضربو من 30 سنة وخلاه يتورم والله يرحمك يا جدي قديش كانت حلولك جذرية وقت ناقشت فكرة قتل الاستاذ على الخالص بموضوعية كحل نهائي لإرواء غليل العائلة المكلومة والحمد لله يلي اتدخل المدير صلحة وانتهت القصة على خير.

لك قلبي وشو يعني غرق قارب برحلة مدرسية ولا بسمار بحيط الباحة على مستوى راس أطفال الروضة ولا بلور حمام مكسور وقد يؤدي لبتر أصابيع طفل ولا شريط كهربا مزلط من هون ولا طالب بفوت بسكين على المدرسة من هنيك أو مكرو أطفال قلب من السرعة ولا شوفير باص مدرسة دعسلو شي طفلة أي ولك بتصير بأحسن المدارس و هاد كلو بهون قدام جمال مدارسك من برا ومن جوا ويلي بدو ياكل العسل بدو يلقى قرص النحل يا عسل إنت ولك دخيل الدبأ. معلش يا قلبي هاللت والعجن يلي عم يصير على أساليبك وكوادرك كلو حكي فاضي وهدفهن تشويه سمعتك لك تقبريني إنت وسمعتك يلي متل الفل(قة) ، لك الله ما يحرمني منك وانت وهال200 ألف موظف من كوادرك يلي معهن سادس ومادون وهنن بشكل أو بآخر مسؤولين عن أجيال المستقبل وعن رسم ملامح إسلوبك التعليمي.

أنا يا عمري ما لح افتح قصة ما بعد البكالوريا لأنو بعرف هي أختك التعليم العالي لحالها قصة خلينا بس بذكرياتنا الحلوة عن البكالوريا وما دون ، والله يا قلبي حاليا أكتر من نص عمري أنا عايشو بحبك وغرامك فيعني والله عندي كتير ذكريات حميمة بدي احكيها.

من كم يوم وأنا ماشي غصيت من قلبي وقت شفت استاذي العسكرية بالإعدادي عم يسوق مكرو وتذكرت إنو مو بس هو كمان استاذ الرياضة على خط تاني وموجه الطابق التاني شوفير تكسي بعرف الشغل مو عيب وبعائلتي في ناس هي مهنتهن بس يعني استاذ وشوفير والله مو ظابطة لأنو يا قلبي أنا وإنت منعرف شو يعني شوفير يعني واحد إلو ستايل خاص وخلق ليكون شوفير أو أبو جانتي مو استاذ مربي فاضل. هلق بحكم كان في معرفة مع كم أنسة بالابتدائي تم ترشيحي لكون رائد المدرسة بالطلائع في مجال الزراعة (مع إني لا أفقه شيء بالزراعة) لنافس على مستوى مدينة دمشق لأنو المجالات التانية كانت موزعة بين أبناء وبنات الأنسات يعني حسيت مدرستنا عبارة عن دولة صغيرة والله كان عنا علم ونشيد ومجلس بيجتمعو فيه والأنسات يتناوبو على حراسة الطلاب وقت الباحة وعطل رسمية ووسايط وبوفيه وكهربا ومي ومجالس تأديب والذي منو يعني دولة صغيرة

هلق مرة بالإعدادي أكلت كفين غدر من أستاذ الكمبيوتر لأنو لقطني حاطط فلوبي بالكمبيوتر وعم انسخ فايل user.dll ما عرف شو هو (أعتذر عن الشرح للاختصار) شرحتلو إنو لازمني لكمبيوتري بس ما فهم وقال عم خرب الممتلكات العامة وباغتني بالكفين بعد أيام شافني برا المدرسة وحكينا وعرف إني فهمان بالكمبيوتر فصرنا صحبة وصار يسألني أسئلة بالكمبيوتر مشان يطور معلوماتو. ي

ا روحي والله ما بعرف شو الحل بالنسبة إلك يعني والله مصيبة مشغلة قسم كبير من البشرية وكيف بدك تأهليهن ولا تغيريهن ما بعرف بس أكيد في حدا بيعرف وخصوصا إنو المناهج هلق على مبدأ ما حدا بيعرف بس يعني مع الزمن إن شاء الله كلشي بينحل وإن كنا بحلقة مفرغة بس بالأخير بدها تنحل منضل منجرب بهالأجيال لحتى تنحل شو ورانا يعني ما حدا لاحقنا بعصاية ونحنا تقال ما منلحق حدا خلي هنن يجو لعنا.

تم النشر على موقع زمان الوصل انقر هنا للدخول

Advertisements

قمة الحب


سأظَلُّ أسعى للسما حَذِرا
فلا ترضى نفسي أيما قِمَمُ
الحمد لله على كل حالٍ
ونعملُ شكراً فكلنا نِعَمُ
قالوا رؤوسُ الجِبال لا تلتقي
قلت بلى وتبقى وتلتحم
ألم تسمعوا قصة قمة
طارت بنارٍ اسمها حِمَمُ
فصارت قمةً لجبلٍ جديدٍ
بأحلى الصفات وبالعلوِّ تتَّسِمُ
قالوا الحبُّ يحرِّك هذا الكَونَ
قلت يحرِّكُ ويسكن بل و يبتسم
بأمرِ خالِقِ الكَونِ ومُحي القُلوبِ
ومُخرِجِ الثِمارِ بتُرابٍ أَصلُهُ رِمَمُ
بيَدِهِ نارُ القَلبِ تَقوى وتَشتَعِلُ
ونصيبي من النار يقوى ويلتهم
اللهم أجِرنَا من نار العقاب
بنار دنيا الحبِّ بالسِّلمِ تتَّسِمُ


هل تحب الحب أم تكرهه


البعض ذم الحب والبعض مدحه بغض النظر هل هو فعل إرادي أم لا إرادي ، ذموه لأنه يعرض الإنسان للذل ومدحوه لما يجلب للأنسان من حب وفرح.

سبب مدحه هو سبب ذمه و (ظبطها إذا بتظبط) لولا ما يأتي للشخص من فرح ولذة لما ذل فيه.

ويحسن إظهار التجلد للعدا … ويقبح غير العجز عند الأحبة

جذر كلمة ذل في اللغة العربية ذ ل ل وجذر اللذة ل ذ ذ شيء يدعو للتأمل ولست باحثا في علم اللسانيات لأسرد ذلك في اللغات الأخرى.

جميع الشعوب لديها قصص عن الحب والشجاعة والصدق وقسم بعض الفلاسفة الإغريق صفات الإنسان إلى :

صدق و حب وشجاعة وباقي الصفات التي نعرفها ما هي إلا اندماج أو غياب لهذه الثلاثة أو درجات لها لا تسألني كيف!

ويقول ابن القيم الحب أصل الحركة في العالم العلوي والسفلي.

والكل يعرف مقولة الله محبة عند المسيحيين ولا أستطيع سرد ما ألف في التراث الإسلامي عن الحب لكثرته عن الحب بشكل عام وعن الحب الخاص أي بين الرجل والمرأة.

فأما الحب بشكل عام فلا يخلو مؤلف من ذلك مثل مؤلفات الفقه وتفاسير القرآن وشروح الأحاديث وقد أفرد البعض (خصص) مؤلفات عن ذلك مثل روضة المحبين لابن القيم ومعروف حالات الصوفية من العشق والحب والخمرة الإلهية.

والحب بشكله الخاص الموجود بين الرجل والمرأة أيضا له نصيبه فمعروفة القصص كمجنون ليلى وعنتر وعبلة ومعظم الشعراء كان لهم من يتغنون بها ومعروفة بعض المؤلفات كطوق الحمامة لابن حزم و كتزيين الأسواق في أخبار العشاق لداوود الأنطاكي وستجد الكثير في طيات الكتب مخبأ تحت عناوين مثل آداب النكاح أو آداب المعاشرة.

ويكاد يكون الغناء والموسيقى كله عن الحب إن لم نقل الفن ومنه الشعر بشكل عام وحتى من يقسم الفن إلى ملتزم وغير ملتزم فالفن الغير ملتزم أو الهابط كما يقال لا يخلو من الحب في أحد أشكاله شئنا أم أبينا  والباقي يتغنا بأنواع الحب حب الوطن أو الأهل أو الله أو حب المحبوب ولكن بالتزام باعتباره فن ملتزم .

وهنا يبرز موضوع مرتبط ارتباطا وثيقا بالحب وان كان البعض لا يحب ربطه بالحب وهو الجنس بالاصطلاح المترجم

ووجود مصطلح الحب العذري نسبة إلى قبيلة عذرة العربية يؤكد الارتباط لتعجب الناس من هذه القبيلة فالاستثناء يؤكد القاعدة ولا ينفيها.

وفي التراث العربي ليس هناك مصطلح يسمى الجنس كما يفهم اليوم بل هناك مصطلحات منفصلة ومنوعة وقد يخجل البعض منها مثل المداعبة والمعاشرة والنكاح والزنا فليس هناك مصطلح جامع وهذا أفضل فلا يجمع الزنا والنكاح بنفس المنزلة.

حاول البعض تفسير علاقة الحب بشكل كيميائي والبعض بشكل مادي ولكن من أحب يعلم أنه لا تفسير له فهو كالجنون أفعال بدون أسباب:

قالوا جننت بمن تهوى فقلت لهم                       العشق أعظم مما بالمجانين