لعل الأفكار تحب الحرية فتتحول إلى كلمات

Posts tagged “ساخر

رسائل غرامية – التربية


حب من النظرة الأولى ،هاد يلي صار فيني وقت شفت عدد العاملين فيكي (350,000) لك يا قلبي أكتر من تعداد الجيش ،هلق الصراحة الحق معك لأنو مين هاد يلي ما وقع بغرامك ما حبك إلزامي والأمية خلت أنسة القومية بصف السابع تبكي وهي عم تورجينا بأول السنة بعض الأكتشافات ،إنو في طلاب نجحو من السادس وما بيعرفو يقرو ويكتبو ،طبعا أنا ضليت مفكرها تمثيلة باعتبار كل رفقاتي بصف السادس بيعرفو يقرو ويكتبو إلا ابن المديرة كان يخربط بالإملاء ،لحتى كبرت وشفت أطفال صف سادس ولسا ما بيعرفو يقرو ويكتبو فهنن على الورق غير أميين ولكن على أرض الواقع كائنات غريبة سبحان الله خالق الأكوان وخالق المكتب المركزي للإحصاء.

يا روحي إنت قديش زعجوكي بالفترة الأخيرة بقصة الضرب وكأنو هية شغلة جديدة ولك خسئوا ، هلق صحيح أنا بينعدوا على أصابع الإيد الأتلات يلي أكلتهن وكل مرة أمرض ويجي بابا يتخانق مع الأنسة وتصير تخاف تضربني وبالإعدادي الموجه كان رفيق الوالد وبالثانوي كنت صاحب بدعة الخروج من الصف وعدم الرضوخ لاستاذ مجنون بدو يضرب كل الطلاب، بس والله بتذكر رفقات مساكين كل يوم أتلة وبطرق تحرك مراكز الإبداع والشعور كالشد من السوالف والفلقة على اجرين مبلولين وعص الأصابع على قلم بلاستيك بس يعني هنن مو مربايين ببيت أهلهن بيستاهلو لك قلبي معلش ،هدول أطفال وبعض المذاهب الفلسفية المتطرفة بتعتبرهن شياطين صغيرة لازم نهذب أخلاقهن وبعدين يا عمري ضرب الحبيب زبيب. الله يعافيها ستي لهلق بتدعي على استاذ عمي يلي ضربو من 30 سنة وخلاه يتورم والله يرحمك يا جدي قديش كانت حلولك جذرية وقت ناقشت فكرة قتل الاستاذ على الخالص بموضوعية كحل نهائي لإرواء غليل العائلة المكلومة والحمد لله يلي اتدخل المدير صلحة وانتهت القصة على خير.

لك قلبي وشو يعني غرق قارب برحلة مدرسية ولا بسمار بحيط الباحة على مستوى راس أطفال الروضة ولا بلور حمام مكسور وقد يؤدي لبتر أصابيع طفل ولا شريط كهربا مزلط من هون ولا طالب بفوت بسكين على المدرسة من هنيك أو مكرو أطفال قلب من السرعة ولا شوفير باص مدرسة دعسلو شي طفلة أي ولك بتصير بأحسن المدارس و هاد كلو بهون قدام جمال مدارسك من برا ومن جوا ويلي بدو ياكل العسل بدو يلقى قرص النحل يا عسل إنت ولك دخيل الدبأ. معلش يا قلبي هاللت والعجن يلي عم يصير على أساليبك وكوادرك كلو حكي فاضي وهدفهن تشويه سمعتك لك تقبريني إنت وسمعتك يلي متل الفل(قة) ، لك الله ما يحرمني منك وانت وهال200 ألف موظف من كوادرك يلي معهن سادس ومادون وهنن بشكل أو بآخر مسؤولين عن أجيال المستقبل وعن رسم ملامح إسلوبك التعليمي.

أنا يا عمري ما لح افتح قصة ما بعد البكالوريا لأنو بعرف هي أختك التعليم العالي لحالها قصة خلينا بس بذكرياتنا الحلوة عن البكالوريا وما دون ، والله يا قلبي حاليا أكتر من نص عمري أنا عايشو بحبك وغرامك فيعني والله عندي كتير ذكريات حميمة بدي احكيها.

من كم يوم وأنا ماشي غصيت من قلبي وقت شفت استاذي العسكرية بالإعدادي عم يسوق مكرو وتذكرت إنو مو بس هو كمان استاذ الرياضة على خط تاني وموجه الطابق التاني شوفير تكسي بعرف الشغل مو عيب وبعائلتي في ناس هي مهنتهن بس يعني استاذ وشوفير والله مو ظابطة لأنو يا قلبي أنا وإنت منعرف شو يعني شوفير يعني واحد إلو ستايل خاص وخلق ليكون شوفير أو أبو جانتي مو استاذ مربي فاضل. هلق بحكم كان في معرفة مع كم أنسة بالابتدائي تم ترشيحي لكون رائد المدرسة بالطلائع في مجال الزراعة (مع إني لا أفقه شيء بالزراعة) لنافس على مستوى مدينة دمشق لأنو المجالات التانية كانت موزعة بين أبناء وبنات الأنسات يعني حسيت مدرستنا عبارة عن دولة صغيرة والله كان عنا علم ونشيد ومجلس بيجتمعو فيه والأنسات يتناوبو على حراسة الطلاب وقت الباحة وعطل رسمية ووسايط وبوفيه وكهربا ومي ومجالس تأديب والذي منو يعني دولة صغيرة

هلق مرة بالإعدادي أكلت كفين غدر من أستاذ الكمبيوتر لأنو لقطني حاطط فلوبي بالكمبيوتر وعم انسخ فايل user.dll ما عرف شو هو (أعتذر عن الشرح للاختصار) شرحتلو إنو لازمني لكمبيوتري بس ما فهم وقال عم خرب الممتلكات العامة وباغتني بالكفين بعد أيام شافني برا المدرسة وحكينا وعرف إني فهمان بالكمبيوتر فصرنا صحبة وصار يسألني أسئلة بالكمبيوتر مشان يطور معلوماتو. ي

ا روحي والله ما بعرف شو الحل بالنسبة إلك يعني والله مصيبة مشغلة قسم كبير من البشرية وكيف بدك تأهليهن ولا تغيريهن ما بعرف بس أكيد في حدا بيعرف وخصوصا إنو المناهج هلق على مبدأ ما حدا بيعرف بس يعني مع الزمن إن شاء الله كلشي بينحل وإن كنا بحلقة مفرغة بس بالأخير بدها تنحل منضل منجرب بهالأجيال لحتى تنحل شو ورانا يعني ما حدا لاحقنا بعصاية ونحنا تقال ما منلحق حدا خلي هنن يجو لعنا.

تم النشر على موقع زمان الوصل انقر هنا للدخول

Advertisements

سقوط راقصة


عندما تبدأ معركة التشات بيني وبين صديقي عمر عباس وتبدأ جراحات المعركة التجميلية تنزف على شاشة الكمبيوتر والاصابع تتسابق إلى مفاتيح الكيبورد للملمة الجراح بصوت تكتكي حاد يكون آن الأوان لابداع تشاتي جديد

me: ‫كيفو

omar: مو ماشي

me: ‫علاه = ليش

‫علاه يا العزيز = ليش يا صاحبي

اهدر وش كاين راني سامع = حكي شوفي أنا عم اسمع

omar: و الله

يا حبيب

الوواقع العادي الحلو

او الاليم

دائما بسكر بوجوهنا

أحلام صعبة التحقيق

ونحن الحالمون

او مستعطفي الحياة

me: ‫جاييك نفحت ضغط شعوري معناها لأنو هو دائما مسكر بس نحنا ننسى

omar: دائماً عنا أمل

و هيك

تمام

me: ‫أي ليك هو الكاسة فيها نصفين

omar: ممممممممم

يلعن ابو هالكاسة

ضلينا نتفرج عنصها الملين لحتى نشف

المليان

me: ‫أوافقك الرأي بس هي ما بتنشف نحنا أوقات منشربها بسرعة وطج رد منصحا

‫الله وكيلك من يوم كنت لح اصحا صحوة

omar: و كعبك أبيض

ليش عندكن جماعة الصحوة كمان

me: ‫يعني لولا لطف الله كنت لح اصحا وشوف الواقع مرة تانية بس فتت استهديت بالرحمن واخدت دوش ورجعت تناسيت كلشي

‫اخي قولا واحدا يجب ان نتعود الألم

omar: و الله مهم

انو الواحد ما يصحصح

العمة

me: ‫انت هيئتك صحيت

omar: هدول جماعة نسكافيه بدهن يروحونا

من كتر القهوة

صحيت

انا اللي صار معي

انو انفتحلي شباك بحياتي الرتيبة على الدنيا الحلوة

المشمسة

me: ‫وقت الواحد بصير معو مشكلة بقوم بيصحا لأنو بتتنبه عندو مراكز الشعور متل الصوبية وقت تنفض

omar: و المصيبة من فرحتي

نطيت من الشباك

وطلعت وبدون ما اعرف

me: ‫انكسرت رقبتك شي؟؟

omar: بآخر طابق

لاء

بس وقعت

انا نطيت

كان لازم ابقى عم اتفرج من بعيد

و اتمتع

بس الدمناظر غرتني

و انا نطيت

نطة الارنب الاجدب

me: ‫تخيل الغرفة يلي نطيت منها بقلب غرفة تانية والتانية بقلب تالتة وهكذا

‫يعني البني آدم بضل ينط

‫هي هي خبرة الحياة

‫وكل ما ينط بفكر حالو هي اكبر نطة

‫بيتفاجأ انو لسا في برا ولسا في شباك

‫رد يندفع بغريزة الانسان الهمجي

‫وطق بنط يا بتنكسر رقبتو يا بيتوجع شوي

omar: كتير صح كلامك

بس كل شباك عم نط منو

عم يخليني خاف كتير من اللي بعدو

و عم اكره الشبابيك

me: ‫رد بقوم بنفض الغبرة وبيقعد بهل غرفة المحدودة الحيطان ضمن روتين أربع حيطان وسقف

omar: صاير انا

me: ‫طق بيفتح شباك بمد راسو

‫يا بيجي حدا بسلخك طيارة وبيشلفك برا لأنو أوقات بتنط رغم إرادتك

‫أو انت بحماسة السعادين بتنط

‫لا تفكر انك تضل جوا الغرفة

‫لأنو الحيطان إلها أدان وإيدين ورجلين كمان

omar: اي

و السعدان ما بيهدا

الحيطان الها شوك

والها الوان مقيتة

وما بتحس

الحيطان عدوة السعدان

me: ‫اي طبعا بس في سعادين تم ترويضها

‫بحيث أصبحت جاج

‫يعني نوم وبيض

omar: اي

me: ‫هلق في عندك واحد بيعرف شو عمل من سنتين

omar: صرلي عم حارب سياسة التجييج كتير

me: ‫لأنو نفس الشي

omar: و عم دور ع شبابيك ونط

ونط

ونط

صرلي ناطط من مليون شباك

ولساتني بنفس الغرفة

me: ‫لا انت هيك بتظن

‫الغرف متشابهة

‫بس بتصير أكبر

‫ومعجوقة أكتر

‫غير اذا وقعت على راسك وفقدت الذاكرة

‫بترجعلك كم غرفة لورا

‫مشان هيك أهل أول قالو تعا من الباب لا تنط من الشباك

‫عادي أبو شريك

‫شوف أنا مثلا فتت من الباب طلع مافي درج

‫ووقعت كمان

omar: اففففففف

يعني مع انك جربت الباب

بس طلع بلا درج

me: ‫اي

‫اذا لح توقع فلح توقع

‫مشان هيك نط من الشباك ضمن الثوابت والأخلاقيات

‫اذا متت بتموت شهيد

omar: اخ لا قيات

me: ‫طبعا أخلاقيات الهنة

‫المهنة

‫لأنو الأخلاقيات في السقوط مهمة

‫في ناس بتوقع طج

‫في ناس شك

‫في ناس خبط

‫لازم تراعي الجوار أهم شي

omar: ادبيات السقوط

me: ‫أي

‫أديب الدايخ

‫من كتر ما وقع

omar: داخ

بس أديب

me: ‫وفي أديب عربي قديم شو قال

‫والله ما بعرف شو قال

‫بس يعني شي عن سقوط الشعر

omar: تساقط؟

الاديب محمد شكو؟

me: ‫في كتاب للإمام الغزالي الله يرحمو اسمو تهافت الفلاسفة

‫آم ابن رشد ألف تهافت التهافت

‫تساقت الأديب محمد شكو

‫تساقط

‫بتحسو نهاية لمدرسة أدبية

‫أو نوع من الانحطاط الفكري

omar: الواسع

خلاصة ومحصلة الأدب

me: ‫يعني متل واحد كان يكتب عن الفلسفة العقلية وصار يكتب قصص بوليسية

omar: يجمعها لكم الاديب محمد شكو

و ترافقه الراقصة ليالي

me: ‫اي اهم شي الراقصة ليالي تسقط على الارض من الانهاك

‫على خشبة الرقص

omar: و تتهافت قبلات الجماهير

على جميع انحاء و بقاع جسدها العاري

الذي انهكه الهز

طلبا لقمة العيش

الحلال

me: ‫شايف كيف وراء كل سقوط مأساة ووراء كل مأساة امرأة

omar: الرواية البوليسية الجديدة

سقوط راقصة

راجعلك

عشر دقايق


وصية أب لابنه


يا ابني أنا بعد عمر طويل رايح من هالدنيا ما بعرف لوين
دير بالك على أملاكي، إنت ما بتعرف أنا قديش سرقت ونهبت ودفعت رشاوي وهدايا حتى جمعتها
يا ابني اذا بدك تضاعف هالأموال لازم تتعلم مني وتمشي على خطايي
يا ابني لازم تدعس على العالم وإلا العالم لح تدعس فوقك وكل الناس يلي بتعرفهن ما حدا بمدلك ايدو اذا مالو مصلحة معك والمصاري هي أقوى المصالح
أبدا لا تفكر غير بحالك ، ومصلحتك أهم شي بهل الدنيا ، يا ابني هاد الحكي تبع الناس الدراويش عن القناعة أو عمل الخير لوجه الله هاد كلام مشان يتقبلو الواقع المر يلي هنن فيه. بس نحنا والحمد إلي واقعنا أحلى منو مافي وإذا بدك تلحق الدراويش بدك تصير متلهن
انسى أصلك وانسى بلدك واتذكر أنو اذا معك قرش بتسوى قرش
لا تخدم شخص اذا ما الك مصلحة معو لأنو الوقت ضيق وحقو مصاري ،لا تعلم حدا شي لأنو المعلومات حقها مصاري
اعرف يا ابني أنو المصاري بتشتريلك كلشي
أوعك تلحق الكلام الفاضي تبع المشاعر والأحاسيس والروح وهالقصص تبع الناس العاديين هي كلها مخدرات مشان العقل ما يحس بعذاب الفقر وعذاب الحرمان
يا ابني لا تضحك بوش حدا أقل منك مشان ما ياخد وش ويطلب منك مساعدة واضحك بوش يلي معهن أكتر منك لأنو بتقدر معاهن تزيد أموالك أكتر وأكتر
يا ابني هي حصيلة خبرتي بهل سنين الطويلة وأنا رايح على منتجع تطويل العمر بسويسرا برجع بعد شهر
يا بابا انت بتعرف انو انا مسؤول عن حمايتك الشخصية
أي بعرف يا ابني
يا بابا نصيحة لا ترجع وإلا مالح تكمل حياتك
شو هالحكي يا ابني
متل ما عم قلك يا بابا ، أنا برأيي صرت قادر إني دير الأملاك لحالي ومصروفك كبير وبرأيي ما عاد في حاجة إلك أنا عندي معارفي وعلاقاتي وصار لازم استخدم هالأموال بمعرفتي
لا يا ابني أنا أبوك ما بيصير هالحكي بغضب عليك
روح يا بابا قول هالحكي للدراويش أنا تعلمت كلشي منك وانت ما عاد تلزمني بشي فروح انفد بريشك احسنلك
آآآآخ قلبي

وهكذا مات الأب (أو قتل) بأزمة قلبية وتوافد المئات يقدمون التعازي للابن واستمر الابن بتطوير واستثمار أعمال الأب