لعل الأفكار تحب الحرية فتتحول إلى كلمات

Posts tagged “كوميديا سوداء

رسائل غرامية – التربية


حب من النظرة الأولى ،هاد يلي صار فيني وقت شفت عدد العاملين فيكي (350,000) لك يا قلبي أكتر من تعداد الجيش ،هلق الصراحة الحق معك لأنو مين هاد يلي ما وقع بغرامك ما حبك إلزامي والأمية خلت أنسة القومية بصف السابع تبكي وهي عم تورجينا بأول السنة بعض الأكتشافات ،إنو في طلاب نجحو من السادس وما بيعرفو يقرو ويكتبو ،طبعا أنا ضليت مفكرها تمثيلة باعتبار كل رفقاتي بصف السادس بيعرفو يقرو ويكتبو إلا ابن المديرة كان يخربط بالإملاء ،لحتى كبرت وشفت أطفال صف سادس ولسا ما بيعرفو يقرو ويكتبو فهنن على الورق غير أميين ولكن على أرض الواقع كائنات غريبة سبحان الله خالق الأكوان وخالق المكتب المركزي للإحصاء.

يا روحي إنت قديش زعجوكي بالفترة الأخيرة بقصة الضرب وكأنو هية شغلة جديدة ولك خسئوا ، هلق صحيح أنا بينعدوا على أصابع الإيد الأتلات يلي أكلتهن وكل مرة أمرض ويجي بابا يتخانق مع الأنسة وتصير تخاف تضربني وبالإعدادي الموجه كان رفيق الوالد وبالثانوي كنت صاحب بدعة الخروج من الصف وعدم الرضوخ لاستاذ مجنون بدو يضرب كل الطلاب، بس والله بتذكر رفقات مساكين كل يوم أتلة وبطرق تحرك مراكز الإبداع والشعور كالشد من السوالف والفلقة على اجرين مبلولين وعص الأصابع على قلم بلاستيك بس يعني هنن مو مربايين ببيت أهلهن بيستاهلو لك قلبي معلش ،هدول أطفال وبعض المذاهب الفلسفية المتطرفة بتعتبرهن شياطين صغيرة لازم نهذب أخلاقهن وبعدين يا عمري ضرب الحبيب زبيب. الله يعافيها ستي لهلق بتدعي على استاذ عمي يلي ضربو من 30 سنة وخلاه يتورم والله يرحمك يا جدي قديش كانت حلولك جذرية وقت ناقشت فكرة قتل الاستاذ على الخالص بموضوعية كحل نهائي لإرواء غليل العائلة المكلومة والحمد لله يلي اتدخل المدير صلحة وانتهت القصة على خير.

لك قلبي وشو يعني غرق قارب برحلة مدرسية ولا بسمار بحيط الباحة على مستوى راس أطفال الروضة ولا بلور حمام مكسور وقد يؤدي لبتر أصابيع طفل ولا شريط كهربا مزلط من هون ولا طالب بفوت بسكين على المدرسة من هنيك أو مكرو أطفال قلب من السرعة ولا شوفير باص مدرسة دعسلو شي طفلة أي ولك بتصير بأحسن المدارس و هاد كلو بهون قدام جمال مدارسك من برا ومن جوا ويلي بدو ياكل العسل بدو يلقى قرص النحل يا عسل إنت ولك دخيل الدبأ. معلش يا قلبي هاللت والعجن يلي عم يصير على أساليبك وكوادرك كلو حكي فاضي وهدفهن تشويه سمعتك لك تقبريني إنت وسمعتك يلي متل الفل(قة) ، لك الله ما يحرمني منك وانت وهال200 ألف موظف من كوادرك يلي معهن سادس ومادون وهنن بشكل أو بآخر مسؤولين عن أجيال المستقبل وعن رسم ملامح إسلوبك التعليمي.

أنا يا عمري ما لح افتح قصة ما بعد البكالوريا لأنو بعرف هي أختك التعليم العالي لحالها قصة خلينا بس بذكرياتنا الحلوة عن البكالوريا وما دون ، والله يا قلبي حاليا أكتر من نص عمري أنا عايشو بحبك وغرامك فيعني والله عندي كتير ذكريات حميمة بدي احكيها.

من كم يوم وأنا ماشي غصيت من قلبي وقت شفت استاذي العسكرية بالإعدادي عم يسوق مكرو وتذكرت إنو مو بس هو كمان استاذ الرياضة على خط تاني وموجه الطابق التاني شوفير تكسي بعرف الشغل مو عيب وبعائلتي في ناس هي مهنتهن بس يعني استاذ وشوفير والله مو ظابطة لأنو يا قلبي أنا وإنت منعرف شو يعني شوفير يعني واحد إلو ستايل خاص وخلق ليكون شوفير أو أبو جانتي مو استاذ مربي فاضل. هلق بحكم كان في معرفة مع كم أنسة بالابتدائي تم ترشيحي لكون رائد المدرسة بالطلائع في مجال الزراعة (مع إني لا أفقه شيء بالزراعة) لنافس على مستوى مدينة دمشق لأنو المجالات التانية كانت موزعة بين أبناء وبنات الأنسات يعني حسيت مدرستنا عبارة عن دولة صغيرة والله كان عنا علم ونشيد ومجلس بيجتمعو فيه والأنسات يتناوبو على حراسة الطلاب وقت الباحة وعطل رسمية ووسايط وبوفيه وكهربا ومي ومجالس تأديب والذي منو يعني دولة صغيرة

هلق مرة بالإعدادي أكلت كفين غدر من أستاذ الكمبيوتر لأنو لقطني حاطط فلوبي بالكمبيوتر وعم انسخ فايل user.dll ما عرف شو هو (أعتذر عن الشرح للاختصار) شرحتلو إنو لازمني لكمبيوتري بس ما فهم وقال عم خرب الممتلكات العامة وباغتني بالكفين بعد أيام شافني برا المدرسة وحكينا وعرف إني فهمان بالكمبيوتر فصرنا صحبة وصار يسألني أسئلة بالكمبيوتر مشان يطور معلوماتو. ي

ا روحي والله ما بعرف شو الحل بالنسبة إلك يعني والله مصيبة مشغلة قسم كبير من البشرية وكيف بدك تأهليهن ولا تغيريهن ما بعرف بس أكيد في حدا بيعرف وخصوصا إنو المناهج هلق على مبدأ ما حدا بيعرف بس يعني مع الزمن إن شاء الله كلشي بينحل وإن كنا بحلقة مفرغة بس بالأخير بدها تنحل منضل منجرب بهالأجيال لحتى تنحل شو ورانا يعني ما حدا لاحقنا بعصاية ونحنا تقال ما منلحق حدا خلي هنن يجو لعنا.

تم النشر على موقع زمان الوصل انقر هنا للدخول

Advertisements

ثورة الخواريف (المعروفة بماااع)


بعد ارتفاع أسعار اللحوم والبندورة قرر مجتمع الخواريف الاستغناء عن كل ما لونه أحمر مشتملا التيارات اليسارية كافة بل وحتى اللحم الأبيض بسبب غلاء الفروج وتقرر أن يعكف المجتمع على أكل اللون الأخضر بكافة درجاته من الإصفرار إلى السواد.

بالرغم من توفر العشب الأصفر لم يكن يشعر مجتمع الخواريف بالسعادة لأنه لا يجوز له الرعي أينما أحب ويمنع في كثير من الأحيان من المروج الخضراء بحجة مكافحة التصحر والحرص على وحدة الخواريف وأمور من هذا القبيل ولا يسمح له بقول غير كلمة ماع فما كان من مجموعة فتية من الحملان الطائشة إلا أن دعت لاجتماع مجلس الكباش الأعلى من أجل مناقشة قضية سعادة الخواريف التي بدأت تتلاشى مع انتشار روائح المواشي المذبوحة على طريق الزبلطاني والتي لا تقتصر على نشر التلوث وعمالة الأطفال الظاهرة للعيان بل لقطع الطريق على المارة وإثارة الاشمئزاز بدون رقيب أو حسيب من غير علام الغيوب.

قدم ممثل الحملان لمجلس الأكباش الأعلى عريضة مفادها

نحن الخواريف الفتية (ذكور ونعاج مفردها نعجة وهي أنثى الخروف أو غنمة بحسب اللهجة السائدة) نحب أن نرفع لحضرتكم قضيتنا وأن تفيدونا من خبرتكم المتراكمة بعد أن من الله عليكم بالنجاة من السلخ والذبح

نحن لا نشعر بلذة الحياة التي قد تسمى السعادة أو الأمل وخصوصا عندما يتم ركوبنا في بعض الأحيان ونحن لم نخلق لنركب بل خلقنا لنذبح وليستفاد من صوفنا وجلدنا هكذا تعلما في الأول الابتدائي ويشاركنا مشاعرنا ملايين المواشي من العجول والاغنام والأبقار والنوق والجمال

نحن نفكر بثورة خواريف لأعادة حقوقنا المسلوبة لنطالب بحقنا أن نذبح بطريقة تضمن لنا كرامتنا وأن لا يتم ركبنا كالحمير نحن نريد أن نفكر ونقول غير الماع نحن نريد أن نشعر ما نحب أن نشعر ،لا ما يجب أن نشعر

نحن الخواريف نطلقها صرخة مدوية في وجه كلاب الرعي والرعيان أنفسهم لن نرضخ لقوانين الرعي وسنخرج عن القطيع إذا اقتضى الأمر ولو أدى ذلك إلى ذبحنا فالذبح كخروف حر أفضل من الموت كخروف مركوب كالحمير

هنا تعالت أصوات المأمأة (وهو صوت الخروف بالعربية الفصحى جمع الماع يعني) وأخذت الأكباش بالمأماة بقوة إلى أن نهض كبش أسود بقرون مفتولة ولية كبيرة (مؤخرة الخروف وترمز للسطوة والربربة وتختلف الخواريف حسب الجغرافية فخواريف الجزائر مثلا تأتي بذنب بينما خواريف الشرق الأوسط تأتي بما يعرف اللية)

قال الكبش : أيتها الحملان البيضاء ليس لكم وصف سوى الوداعة وهذا البياض الذي تتباهون به يستطيع الجزارون أن يخضبوه باللون الأحمر فتخيلو أنفسكم وما شعور النعجات وهي تراكم تسبحون في برك من اللون الأحمر

أيها الحملان الوديعة ويل لمن خرج عن القطيع فالذئاب تنتظركم لتنهش لحمكم.

أيها الحملان لا ضير من الماع إذا كنا نعيش بهدوء وسلام فالماء ولو كان ملوث والعشب ولو كان أصفر أفضل من التشرد في الأراضي القاحلة حيث لا نباتات ولا ماء.

أيها الحملان باسم مجلس الأكباش الأعلى نعلن انتهاء النقاش ونمزق هذه العريضة حتى لا تصل ليد الراعي وخصوصا أن الأعياد على الأبواب فقد يطلق لحيته ويقوم بمشروع لتشجيع سنة الأضحية لا يهدف من ورائه إلا ذبح من أمضى على هذه العريضة.

تعالت المأمأة مرة أخرى واستمرت إلى يومنا هذا والدليل اسمع لأي قطيع من الخرفان ستسمع كلمة مااااع