رسائل غرامية – التربية
حب من النظرة الأولى ،هاد يلي صار فيني وقت شفت عدد العاملين فيكي (350,000) لك يا قلبي أكتر من تعداد الجيش ،هلق الصراحة الحق معك لأنو مين هاد يلي ما وقع بغرامك ما حبك إلزامي والأمية خلت أنسة القومية بصف السابع تبكي وهي عم تورجينا بأول السنة بعض الأكتشافات ،إنو في طلاب نجحو من السادس وما بيعرفو يقرو ويكتبو ،طبعا أنا ضليت مفكرها تمثيلة باعتبار كل رفقاتي بصف السادس بيعرفو يقرو ويكتبو إلا ابن المديرة كان يخربط بالإملاء ،لحتى كبرت وشفت أطفال صف سادس ولسا ما بيعرفو يقرو ويكتبو فهنن على الورق غير أميين ولكن على أرض الواقع كائنات غريبة سبحان الله خالق الأكوان وخالق المكتب المركزي للإحصاء.
يا روحي إنت قديش زعجوكي بالفترة الأخيرة بقصة الضرب وكأنو هية شغلة جديدة ولك خسئوا ، هلق صحيح أنا بينعدوا على أصابع الإيد الأتلات يلي أكلتهن وكل مرة أمرض ويجي بابا يتخانق مع الأنسة وتصير تخاف تضربني وبالإعدادي الموجه كان رفيق الوالد وبالثانوي كنت صاحب بدعة الخروج من الصف وعدم الرضوخ لاستاذ مجنون بدو يضرب كل الطلاب، بس والله بتذكر رفقات مساكين كل يوم أتلة وبطرق تحرك مراكز الإبداع والشعور كالشد من السوالف والفلقة على اجرين مبلولين وعص الأصابع على قلم بلاستيك بس يعني هنن مو مربايين ببيت أهلهن بيستاهلو لك قلبي معلش ،هدول أطفال وبعض المذاهب الفلسفية المتطرفة بتعتبرهن شياطين صغيرة لازم نهذب أخلاقهن وبعدين يا عمري ضرب الحبيب زبيب. الله يعافيها ستي لهلق بتدعي على استاذ عمي يلي ضربو من 30 سنة وخلاه يتورم والله يرحمك يا جدي قديش كانت حلولك جذرية وقت ناقشت فكرة قتل الاستاذ على الخالص بموضوعية كحل نهائي لإرواء غليل العائلة المكلومة والحمد لله يلي اتدخل المدير صلحة وانتهت القصة على خير.
لك قلبي وشو يعني غرق قارب برحلة مدرسية ولا بسمار بحيط الباحة على مستوى راس أطفال الروضة ولا بلور حمام مكسور وقد يؤدي لبتر أصابيع طفل ولا شريط كهربا مزلط من هون ولا طالب بفوت بسكين على المدرسة من هنيك أو مكرو أطفال قلب من السرعة ولا شوفير باص مدرسة دعسلو شي طفلة أي ولك بتصير بأحسن المدارس و هاد كلو بهون قدام جمال مدارسك من برا ومن جوا ويلي بدو ياكل العسل بدو يلقى قرص النحل يا عسل إنت ولك دخيل الدبأ. معلش يا قلبي هاللت والعجن يلي عم يصير على أساليبك وكوادرك كلو حكي فاضي وهدفهن تشويه سمعتك لك تقبريني إنت وسمعتك يلي متل الفل(قة) ، لك الله ما يحرمني منك وانت وهال200 ألف موظف من كوادرك يلي معهن سادس ومادون وهنن بشكل أو بآخر مسؤولين عن أجيال المستقبل وعن رسم ملامح إسلوبك التعليمي.
أنا يا عمري ما لح افتح قصة ما بعد البكالوريا لأنو بعرف هي أختك التعليم العالي لحالها قصة خلينا بس بذكرياتنا الحلوة عن البكالوريا وما دون ، والله يا قلبي حاليا أكتر من نص عمري أنا عايشو بحبك وغرامك فيعني والله عندي كتير ذكريات حميمة بدي احكيها.
من كم يوم وأنا ماشي غصيت من قلبي وقت شفت استاذي العسكرية بالإعدادي عم يسوق مكرو وتذكرت إنو مو بس هو كمان استاذ الرياضة على خط تاني وموجه الطابق التاني شوفير تكسي بعرف الشغل مو عيب وبعائلتي في ناس هي مهنتهن بس يعني استاذ وشوفير والله مو ظابطة لأنو يا قلبي أنا وإنت منعرف شو يعني شوفير يعني واحد إلو ستايل خاص وخلق ليكون شوفير أو أبو جانتي مو استاذ مربي فاضل. هلق بحكم كان في معرفة مع كم أنسة بالابتدائي تم ترشيحي لكون رائد المدرسة بالطلائع في مجال الزراعة (مع إني لا أفقه شيء بالزراعة) لنافس على مستوى مدينة دمشق لأنو المجالات التانية كانت موزعة بين أبناء وبنات الأنسات يعني حسيت مدرستنا عبارة عن دولة صغيرة والله كان عنا علم ونشيد ومجلس بيجتمعو فيه والأنسات يتناوبو على حراسة الطلاب وقت الباحة وعطل رسمية ووسايط وبوفيه وكهربا ومي ومجالس تأديب والذي منو يعني دولة صغيرة
هلق مرة بالإعدادي أكلت كفين غدر من أستاذ الكمبيوتر لأنو لقطني حاطط فلوبي بالكمبيوتر وعم انسخ فايل user.dll ما عرف شو هو (أعتذر عن الشرح للاختصار) شرحتلو إنو لازمني لكمبيوتري بس ما فهم وقال عم خرب الممتلكات العامة وباغتني بالكفين بعد أيام شافني برا المدرسة وحكينا وعرف إني فهمان بالكمبيوتر فصرنا صحبة وصار يسألني أسئلة بالكمبيوتر مشان يطور معلوماتو. ي
ا روحي والله ما بعرف شو الحل بالنسبة إلك يعني والله مصيبة مشغلة قسم كبير من البشرية وكيف بدك تأهليهن ولا تغيريهن ما بعرف بس أكيد في حدا بيعرف وخصوصا إنو المناهج هلق على مبدأ ما حدا بيعرف بس يعني مع الزمن إن شاء الله كلشي بينحل وإن كنا بحلقة مفرغة بس بالأخير بدها تنحل منضل منجرب بهالأجيال لحتى تنحل شو ورانا يعني ما حدا لاحقنا بعصاية ونحنا تقال ما منلحق حدا خلي هنن يجو لعنا.
الغرام حرام – الأوقاف
يستثنى من حرمة الغرام الغرام بين الرجل وزوجته مع خلاف حول وجوب تثبيت الزواج بالمحكمة قبل الغرام وذلك لضمان حقوق المغرومة من الضياع في حال نزغ الشيطان بينها وبين حبيب القلب روميو ، لن أتكلم عن الدين بقدر ما سأتكلم عن الأوقاف وهي هبات المسلمين إلى هذا الدين التي ينبغي أن يعود نفعها وريعها على المؤمنين إلى يوم الدين.
طبعا الكلام بسخرية أو بنوع من التهكم عن سماحتكم يسهل وضعه في مصافي الكفر باعتبار ملاككم جزء من الدين والاستهزاء بجزء من الكل كالاستهزاء بالكل وبالتالي يجب أن لا أدفن في مدافن المسلمين ولا حول ولا قوة إلا بالله رب العالمين على هالزمن يلي تم الخلط فيه بين المؤمنين والمنافقين فأدى ذلك إلى نفور الناس من الدين وذلك بسبب ثلة من المتفيقهين الذين شوهو صورة المسلمين وجعلونا أضحوكة للمتفلسفين
على أي حال أنا لي مقال وربي من سيحاسب في المآل فسأتقي الله ما استطعت وإن أحسنت الظن فاعتبرني ناصحا ولست بطال وكلامي كلام من يسيئه رؤية هذا الحال حبا وعشقا لمستقبل الأطفال،
أكبر تجمع للغرام هو تحت وزارة نصرة خير الأنام مع أحاديث بأن كل المطاعم الأنفة الذكر مؤجرة والريع للوزارة طبعا وهنا يكمن تناقض العصر يعني معصية تحت مظلة الدين ولكن للأمانة فالمكان للعامة وليس للمخمليين باعتبار الدين لا يفرق بين عربي ولا أعجمي والشدة ممنوعة بس الأراكيل مكروهة كراهة تحريمية ويتم الغاء الاراكيل أو السماح بها حسب عمليات المد والجذر المذهبي الحاصلة في الوزارة. وينبغي الإشادة بالمساواة بين الجنسين في هذه المطاعم فليست كما مطاعم الشام القديمة يتم التمييز العنصري على أساس الجنس.
طبعا عمليات الكر والفر المذهبية والجماعاتية داخل الوزارة وداخل كلية الشريعة لا يعلم بتفاصيلها إلا أهل الحل والعقد وأهل الاختصاص ونحن المؤمنون لا ينبغي لنا سوا أن نرا الرخام من الخارج (إشارة إلى المثل الشعبي من برا رخام) وأن نغمض العين عن ما سوا ذلك وأن نقضي بقية حياتنا نبحث لأخوتنا المؤمنين عن سبعين ألف عذر على ما يفعلون ،
ما ندم أحد أصدقائي عندما استشار صديقه في أفضل مكان ليستأجر محلا تجاريا وكانت مداخلة الخبير أنه ولولا معارفنا في وزارة الأوقاف (اسم معروف لن أذكره) لما تمكنا من استئجار هذا المحل بهذا المكان بهذا السعر البخس فهو ملاك للأوقاف فسبحان الذي سخر لهم ابن حلال ليساعد في سرقة المال.
أكيد شخص مغمور مثلي كلامه لن يشكل ولا حتى غبار على هامات الرجال بسبب التكبر والعجرفة المنتشرة بين رجال ديننا الحنيف وأحلى لقطة وقت سحب سماحتو إيدو بعد صلاة العيد وعلى البث المباشر فما كان من المواطن المؤمن الخاشع إلا أن تراجع عن المصافحة وذهب مكسور الخاطر وكانت اللقطة ملخص للحالة الدينية في سوريا وهي أشخاص في بروج عاجية وأناس يقدسون ما لا يقدس.
طبعا المذهب الفكري تبع فرجينا حالك يا شاطر انتشر بشكل كبير في الفترة الأخيرة إلى حد الإشباع ولعبت الفضائيات دور كبير في نشر هذا المذهب ليلبس رجل الدين عباءة مصفحة أخرى تجعله عصيا على النقد فبعد درع تقديس الرجال يأتي درع فرجينا حالك يا شاطر إذا إنت أحسن منو ورحم الله عمر بن الخطاب الذي انتقدته امرأة مو أحسن منو على الهواء مباشرة وتراجع عن خطأه على رؤوس الأشهاد.
وبعد أن حلقت لحيتي التي لا تكاد ترى لأن السيد قائد الشعبة المسلحة أمر بذلك من أجل أن يتم تصويري للأرشيف بكاميرا ويب صورة موبايلي أحسن منها وبعد انتظار دام ساعات وساعات يأتي شخص ومن ورائه شخص يحمل اضبارتين وتم تعريفه على أنه حاجب من وزارة تحريم الرشاوي والأمر بالمعروف دون النهي عن المنكر، فنظرت الأخت الجندية بخشوع وقالت شو منحسن نخدمك فقال: “بدهن يأجلو وما بيقدروا يجو وبخصو جلالته” قالت: “حسنا يا أخي المؤمن” وتم التصوير من الصورة الموجودة على الإضبارة ومنذ ذلك الحين قررت أن ادفع الرشوة حتى لا يتكرر أمامي هذا المشهد المخل بمنظومة قيمي الأخلاقية.
آمل ألا أكون متطرفا فكريا إذا قلت أنه وفي بلد من البلدان العشرة الأوائل في حجم أملاك وزارة الأوقاف وذو بعد إسلامي تاريخي معروف بشام شريف وبموقعه الجيوسياسي وبتركيبته الاجتماعية الفريدة ينبغي أن يكون دور وزارة الأوقاف فيه إقليمي إذا لم نقل عالمي وأن لا يقتصر على رعاية توزيع الملبس (من الحلويات التي توزع بعد الاحتفال بالمولد) ولكن حسبي الله ونعم الوكيل .
أخوكي في الله محمد
رسائل غرامية – الإسكان والتعمير
لك دخيلو يلي إلو تم ياكل مالو تم يحكي، اشتهيت تصرحي شي تصريح أو على الأكثر شي مبادرة نشوف صف هاللولو ورا شي بانل يساير هالصحفيين شوي، يعني إذا مشاريع الفنادق والفيلات إختك تبع السياحة بتستلم الحديث وإذا مشاريع شركات عقارية عالمية جماعة الاستثمار بيطلعو بالسيرة طيب يا عمري إيمت بدك تحكي وتختلطي بالعالم.
والله وقت شوفك بطير عقلي على هالطول بنص ساحة المحافظة بس مشاني إذا بتعزيني تركزيلي هالواجهة يعني شوفي بنك عودة قدامك نفض المكان نفض إذا بتحبي بحكيلك معو والله بيعملك عملية تجميل على حسابو شد ونفخ وشفط والذي منو بخليكي تطلعي أحلى من التأمين أشوفي شو عمل بالساحة ، والله رفيقي قال مرة مو منتبه صف بمحل البابا قال ما بيعرف إنو هون في إنت.
أبشيني يلي ما منسمع عنو غير من تقارير خارجية شي نحنا من أغلى دول العالم بالعقارات وشي جاية الشركات الإماراتية والسعودية تآوينا ، طيب حكيلنا شوي عن حالك وعدينا متل ما كل هالصبايا بتوعد ولك والله ما حدا بحاسبك ولا بقلك ليش ما عملتي إنت بس وعدي.
اليوم بالتكسي كان الشيخ عم يجاوب عن سؤال إلو علاقة بالزواج لو ما كان شيخ حسيتو لح يقول للسائل يا حمار بدك تحب وتتجوز وما عندك بيت ولك روح انقبر وأحلى الشي إنو جاوب على معضلة الحب بليس كل ما يتمنى المرء يدركه بغض النظر إنوا الشب يمكن راح انتحر بس يعني والله نص يلي بينتحروا ويلي ما بينتحروا بقصص الحب الجميلة إذا مو مشاكل عائلات قديمة مشكلة هالمسكين إنو ما عندو بيت.
يعني الواحد بقول لحالو بدو يشتري بيت بالدحاديل مع احترامنا لسكان منطقة الدحاديل فيتفاجأ بسعر المتر قريب من أسعار المدينة وإذا مو قريب فهو مجهول متغير جيبي بشرط يساوي راتب أي موظف لمدة 50 سنة ، هلق بعرف مو ضروري انضرب على قلبي اسكن بنص البلد بس كمان يا روحي موضوع المي والكهربا مصيبة ويعني شايف قديش بيتعبو بيت خالي مشان يعبو مية شرب.
هلق والله بعرف الظروف يا قلبي وإنو إنت بتفكري بالمي والكهربا والصرف الصحي وبراسك مية قصة وقصة بس لك روحي طيب يعني هي دول العالم كيف عم يحاصروا هالمشاكل ،
في شغلة خاصة بيناتنا بخصوص عنوانك على الانترنت خطرلك شي مرة تفتحيه والله جربتو على أكتر من متصفح وحاولت اقرا شوي عن غزلك فيني بس والله تعبت شي روابط مو شغالة وطبعا معجون عجن ، هلق الله يعطي العافية ليلي عاملو ببلاش بس عملو مسابقة بشي جامعة مثلا بصير ببلاش وحلو.
زعلانة يا روحي لأنو ما حدى اجى على آخر مؤتمر عن دور القطاع الخاص بتوفير السكن لذوي الدخل المحدود طيب يا روحي القطاع الخاص بدو يربح ومشاكل ذوي الدخل المحدود إنت والحلوين أمثالك بحلوها ، يعني صحي هنن مشاكلهن كتيرة جماعة ذوي الدخل المحدود بس شو بدنا نعمل يا قلبي هيك الله كتب علينا يعني لازم نشملهن بمشاريعنا وبخططنا ولو بتعبو معلش والله بنوبك أجر وثواب.
بس ما تبلي بخصوص سكن ذوي الدخل يلي مو محدود ليكها يعفور والصبورة شركات معبية الدنيا وفيلات وتجمعات أكيد لازم كمل على حدود لبنان أو اسكن بلبنان إذا بدي شي رخيص أو روح بالاتجاه الآخر بس المشكلة حتى الآخر صاير مدري كيف ، على كل في أفلام عم تقول نهاية العالم 2012 وفي عدنان ولينا قال بهالحدود فمو مشكلة ليش لتعمري وتتعبي وبكرا كلو يروح هيك خلص هيك منيح المهم القناعة والرضا. حبيبك محمد
رسائل غرامية – الاتصالات
مع إنو برد بس حرارة الشوق ما خلتني اكتب عن المازوت ،لأنك أنت حبي الأول والأخير ،من عشر سنين وقلبي معلق فيكي.هيك الله كتب عليي اشتغل بهل مجال ،ويوم بعد يوم عم حس انك الي واني الك أكتر من قبل.
أكتر شي حلو فيكي إنك طموحة ولو ما عندك شي ،يعني بدك ترجعي أمجاد طريق الحرير عن طريق الكابلات الضوئية وتربطي العالم القديم ببعض ،حلو الطموح بس لازم نفكر بعقلنا يعني يا قلبي ،كل يلي عندك مهندسين عم يشتغلو على الراوترات ،واحد منهن صفي بالسجن والتاني عم يركض ما يلحق ،طيب يا قلبي إذا بدك تربطي العالم ما بدك كوادر ،وبعدين بدك تزيدي عدد بوابات الاي دي ا سال من 120 ألف لمليون، طيب يا عمري إنت ما عندك رقم تلفون تردي عليه إذا حدا عندو مشكلة شلون بكرا بدو يصير عندك مليون زبون.
بعدين شوفي اختك تبع الذهب الأسود قد ما سافروا المهندسين آخر الشي لجأت لأسلوب بدي اقصف عمر يلي بدو يسافر ومع هيك عم يلفو ويدورو ويسافروا ، يا روحي الكوادر بعالم الاتصالات أهم شي والله واذا مو مصدقة روحي اسألي، أنا دايما بشوف بابا عم يصرح أنو بدو وبدو وبدو بس يعني مافي شي عم يصير متل ما بدو ،طيب ما خطر على بالو ليش .
ومن كم يوم بجامعة تشرين يعني حكى حكي والله ما بعرف شو بدي قول، طيب ترك مواقع الدنيا وعلق على الفيس بوك ،معبا مواقع تانية ،إيميلاتنا الحمد لله مشاع صفيانة عم تنباع وليكها الإعلانات على المواقع.
بهالتلجات تذكرت قديش بتحبي عيد الميلاد وطول السنة عم تحتفلي وخطوط الانترنت بتضل عم تطفي وتشعل مدري من الضغط مدري من التجهيزات ما حدا بيعرف، بتذكري مرة كيف وقفت الانترنت بكل الشركات مشان فيش (بريز)، طلعتو نسيانين تحفظو إعدادات الأجهزة ولما قمتو الفيش راحت الإعدادات وصارت العالم تركض ما تعرف شو صاير ،ييي على قطاطك شو بتحبي تتسلي بهالشركات والاستثمارات والله يومها مع إني كنت لح ابكي بس ضحكت ونزلو دموعي
دخيل قلبو للتقيل أنا ، بتعرفي العشاق مزودات الانترنت كيف راكدين وراكي وانت ولا هون ،والله كل ما احكي مع واحد قلو شبك ليش مقطوع وزعلان والشركة عنا واقفة ب،قلي من الاتصالات لا حول ولا قوة إلا بالله ،ما بعرف شو بدي احكي بخاف قلو شو دخلني يقلي وانا شو دخلني ما حدا دخلو انت يا فاطرت قلوب العذارى إنت.
بعدين غيري موديل شعراتك والله كتير أوفر ،يعني موديل النكش انقرض من زمان من أكبر مركز لأصغر مركز ليش الكبلات هيك منكوشة طيب مو شايفة وقت بدك كبل كيف بتلحقيه متل كبل الستالايت عيب هالحكي بمجال الاتصالات ،تخيلي تقطعي الاتصال بين الهند وبريطانيا بكرا مشان وصلة كهربا متل ما عملتي مرة فيني.
والله عندك عملة وبعرف إنك فرحانة كتير ويمكن مافي غيرك مؤسسة ربحانة ،بس يعني يا قلبي حدا خطرلو يحسب قديش ممكن تطالعي لو اشتغلتي مظبوط بعدين بتعرفي إنوا المي ماشية من تحتك والناس كلها على الماسنجر عم تحكي.
بعرف قديش العقوبات والمقاطعة عم تكايد فيكي بس كلو الو حل يا روحي ،بعدين مو عيب وزارة ومؤسسة ما تركب انتي فايروس لقبل كم سنة ،والفيروسات على شوي صارت تحكي وتمشي ولولا لطف الله لبلشت تجيب ولاد ناقصنا نحنا ،أي جمعية تنظيم الأسرة عم تنوح على الزيادة السكانية ناقصة كائنات تانية نحنا يا روحي.
بعدين هيك بتضحكي العالم وبتقولي بدك تستلمي المشغل الثالث تبع الخليوي ،إنت المشغلين القدام لح تمدديلهن العقد لأنو مو خرج تستلمي بتقومي بدك تستلمي التالت يا روحي ،ركزي على الكوادر والله مرة مشان أعرف فاتورة انترنت لأنو خط بالضبط اتصلت عشر تلفونات بالأخير طلعت المسؤولة عندها ساعة رضاعة يعني هالحكي ما بقى مقبول هالأيام يا عمري ،يعني شركات الاتصالات بتتبارى أنو الدعم عندها على مدار الساعة إنت بقلب الدوام ما بتردي.
بيناتنا الحكي ،عملي متل شركات إختك تبع الذهب الأسود ،جيبي خبرات من برا ورفعي الرواتب شوي مشان ما يهربو الموظفين وفتحو جامع وكنيسة بركي الله بيهديهن وبيرتفع شوي حسهن بالمسؤولية ،والله حرام هيك عم تضيع هالمصاري عالفاضي وكلو دورات ونشاطات ومعارض بلا طعمة ،والله صرلي سنتين ما رحت على المعرض تبع الاتصالات لأنو آخر مرة كان في واحد عم ينادي 5 سيديات بمية ليرة فحسيت حالي بسوق خضرة وحلفت يمين ما بقى روح على المعرض ،ومراكز هي تبع مدري شو الانترنت الريفية بعرف كلها مساعدات بس في امكانية تكون أحسن أفيد للبلد ،وحقوق الملكية الله يسترك عجلي فيها شوي والله تبهدل الكمبيوتر والبرمجة ،ما لح نطور تكنلوجيا إذا مافي حقوق ملكية فكرية شوفي البلدان حوليكي واسأليهم . حبيبك محمد
مدونة محمد شكو 
أحدث التعليقات